الشعب الكويتي الجميل

الشعب الكويتي لا ابالغ حين اقول انه شعب جميل ممكن في ناس تعقب انه كات لازم اقول شعب رائع او شعب مثالي لكن للاسف رغم الصفات الجميلة اللي يتصف فيها الشعب الكويتي الا انه بعيد عن الكمال و للاسف معدن الشعب بالكويت ما يظهر الا وقت المحن اللي تعرضت لها الكويت , في لحظات المحن نلاقي شعب متكاتف متراص كلمته وحدة ما في اي تفرقة قبلية او طائفية بالعكس تلقى الكل هب و يسارع و يحاول يساعد لاجتياز الازمة و تلقى المعاني الجميلة اللي الجار للجار و علي قولةالاولين الحالة وحدة, انا اتمني ان الشعب الكويتي يظل يتمسك بهالقيم السامية بكل الاوقات و انا كاي كويتية طبعا زرت بلدان كثيرة و عاشرت شعوب و عقب كل تجربة يزيد حبي للكويت و هم علي قولة الاولين اقول (عمار يا كويت) و رغم كل الانتقادات للشعب الكويتي اللي نسمعها و المشكلة الحقيقية ان الشعب الكويتي كل واحد منا سواء كان داخل الدوام بوسط بيته بالمدرسة بالجامعةبالديوانية باستقبال حريم بعزيمة بنات كلنا نعرف عيوبنا ونتقد انفسنا اكثر من غيرنا وصدقوني ان مشكلاتنا لو حاولنا نحط لهاحلول جذرية تنحل بس هم مشكلتنا التحلطم علي
الفاضية و المليانة و صرنا نمزج بين تنوافه الامور و البلاوي العظام ليما يختلط الحابل بالنابل و نلجأ للحل السلبي و نحط حلول كمسكن قصير المفعول فاذا المشكلة كانت صغيرة نبتدي اناقض نفسنا و تقول (الحمدلله احنا احسن من غيرنا احنا بنعمة مو حاسين فيها) و النتيجة ان المشاكل الصغيرة تبتدي تكبر و تتفاقم و تصير بلوى و اذا كانت بلوى كبيرة هم حطينا لها حل سلبي و نقول ( الشق عوود)بس علي قولة اخوانا السوريين وان ما كبرت ما بتصغر و نرجع حق الطير يلي و سياسة التحلطم و عقب التحلطم نرد نقول الحمدلله احنا احسن من غيرنا وندور بدائرة مفرغة و نظل مكانك سر و الشعوب اللي حوالينا تتقدم و تتطور و احنى دولتنا اللي كانت رائدة التطور بين اقرانها الا ان الكل سبقنا و احنا يالله نحاول نلحق توصل مواصيلهم و هذا شي يعور القلب الكل يذكر شنو كنا احنا بالرياضة بكرة القدم وللحين هدف فيصل الدخيل بمباراتنا ضد تشيكسلوفاكيا موضع حديث العالم و اشلون لاعب قوول و اهو بنص الملعب عند خط النص و الشي المحزن الثاني ان شعب الكويت متعلم ماعندنا امية اغلب شبابنا عندهم شهادات جامعية و اذا مو جامعية دبلوم و نسبة بسيطة اللي مكتفين بالشهادات الثانوية و هم في هالسالفة حديث اخر , لاوالمشكلة قمنا نلاحظ مشاكل غريبة علي مجتمعنا قاعدة تطلع وتتفاقم و تنتشر و الكل ساكت انعدم الامان
قمنا نشوف بالجرايد كل شوي خبر وفاة شاب بجرعة زايدة من متى تعاطي المخدرات صار ب هالصورة الواضحة ؟؟؟ انزين وين حلول المشكلة . اشوي و نلقي ظاهرة مستمرة اعتداءات مشينة بالاخلاق لاولاد قصر ؟؟؟؟؟ صرنا مو بس نخاف علي البنات صرنا نخاف علي الاولاد اكثر حتي بمدارسهم غير عصابات اللي كل ساعة بايقين بيت ورا بيت و نرجع حق المسكن والكلام السلبي لا هذيل كله من البدون ؟؟؟و البدون كاي بشر كان محد يرتكب جريمة الا و لها دافع او نتيجة انعدام الرادع ترا حتي البدون مشكلتهم مشكلة و اتعاطف معاهم باغلب الاوقات كفايةلما يكلمونك بلهجة كويتية صحيحة يعني انا ما اقول نساويهم بالكويتين بس علي الاقل نفضلهم عن الاجانب
, اما الطامة الكبرى الشي اللي اعتبره تلوث اجتماعي و اخلاقي انتشار المثليين اللي الحين قاموا يسمونهم بويات و ليديات و جنوس و هالتسميات القبيحة و اي ولية امر تخاف علي بنتها تتوجه للاخصائية الاجتماعية و تقولها انها لاحظت احدي زميلات ابنتها تصرفاتها غير سوية و تخدش الحياءومحتاجة لتقويم ترد عليها الاخصائية ببرود و الله اذا اهلهم ما ربوهم احنا بن ربيهم "عيل ليش سموهها وزارة التربية و التعليم " مو علشانج انت الفاضلة تقومين بعملج الاساسي و لا مستانسة علي مهام خارج مهام التوصيف الوظيفي مثل توزيع حصص الاحتياطي و الضيم اللي اسمه الطابور الصباحي والاذاعة و الحفلات و الخرابيط ومتناسين ان في فئة محتاجة علاج نفسي تراالمثلية الجنسية و الافعال المشينة امراض سلوكية اساسها نفسي محتاجة لتقويم ولو كنت وزيرة للتربية و التعليم كنت ااسس مدرسة تضم الطالبات اللي محتاجين تقويم سلوكي و علاج نفسي و تعطيهم حصص علاج نفسي و سلوكي اجباري بالمدرسة و الا لن تقبلهم اي مدرسة , لان اعتبر هل الفئة مظلومة تتعرض لنبذ بس هل احد مد لهم ايد العون ,و الغريبة ان فئةكبيرة
. منهم تصلي وتذكر ربها بس مادروا ان هل المعصية تهزعرش الرحمن لغضب رب العالمينو ربي اباد من غضبه قومومدينة كامل لارتكابهم هل معصية. .

و المشكلة الامحق ان دايما مشاكلنا نلقيها علي الجيل الجديد دايما و ابدا تلقي كلمة اعيال هل وقت ترا حتي من قبل النفط دايما اللوم يلقي علي الشباب لا الشباب مالهم ذنب ,الشباب ارض خصبة احنا اللي نزرع فيهم القيم او الرذيلة بالعكس الشباب اهم اسهل فئة للاصلاح بس مشكلتنا احنا ما تسعى سعي حقيقي نرضي بالواقع ويا ريت بس جذي نظل مثل النعام ندفن راسنا بالتراب لا و بالعكس نوئد اي بادرة للقت الانتباه او تبويب و تذييل هل المشاكل نلقى الشعب كله صار ام ناصر لسان طويل و الحيل قاصر و نسمع الكلام السلبي واي فضحونا و طلعوا خياسنا جدام الفضائيات لا و عطوا صورة غلط عن الشعب الكويتي مو كل الناس جذي . يا ناس اهم سلاح نحارب فيه مشاكلنا اهي بتبويبها و اقوي سلاح اهو الاعلام و اشرس اعلام اهو الاعلام المرئي اهو سلاح ذو حدين و صدقوني لازم هل الفئة تشوف ردود الفعل و الانتقادات الموجهة لي هل الفئة مو بس جذي بس بنفس الوقت الاعلام مو بس يسلط الضوء علي هل المشكلة و بس لا زم بحط لها انتقادات و يقدم الحلول . انا صراحة احترم دولة قطر الشقيقة بكل شجاعة لما شافوا وجود هل المشكلة بين الشباب اعتبروها خطر حقيقي قاموا بعمل حملة شرسة بداية كانت المخدرات و عقبها حملة شنت ضد السلوك الغير سوي و المثلية و قامت بعمل برامج توعوية و ندوات علنية و نتيجة هالخطوة العظيمة تراجعت نسبة المشاكل السلوكية عتدهم ومو بس جذي الدولة لما حلت مشكلة كانت تارق كثير من الاسر و العوائل القطرية زادات الانتاجية عندهم و ارتفعت نسبة المتعلمين والدولة قاعدة تتطور تطور رهيب .
ادري الاغلبية ما راح يعجبها كلامي و في ناس راح تقول اني اناقض نفسي بنفسي اشلون اقول شعب جميل و انا بس مستهلةبطرح الانتقادات للشعب الكويتي . انا يا اهل الخير مو قصدي انتقد الشعب الكويتي بل عكس لو تحل مشاكل الشعب ما راح يكون في احسن من هالشعب لو كل ام و اب يحط راسه علي المخدة و اهو مطمن علي عياله و مستقبلهم جان شفت مجتمع مثالي الكويتين مثل ما كانوااول اهل الدروازة اهل شرق و جبلة و الدمنة
و يمكن علشان جذي الشعب الكويتي لما يتعرض لمشكلة تهز الوطن يبتدي ينسى يفكر بمشاكله الحياتية و يصب تفكيره في اجتياز المحنة و تلقاه يتصرف بمثالية .
صدقوني انا اعشق الشعب الكويتي ماكو اكثر من الكويتين ناس يحبون بلدهم . انا بحكم اني انجبرت اتغرب عن بلدي سمعت ناس يسبون بلدهم سالت ليش قالوا لي مشاكلهم قالوا: فساداداري واسطات نواب برلمان متلونين شعارات دينيةتخفي مصالح سياسية ضحكت و قلت الظاهرة هذي الظاهر عدوي اقليمية, سالوني انتم هم اتسبون البلد قتلهم الا الكويت ديرتي اشذنبها عطتنا من خيرها نفط و جاه و دستور يكفل الحياة الكريمة ويا حلوها علي حرها وغبارها وصحرتها يا حلاتها بالربيع بالنوير و الخيام اللي تترس مداها , العيب مو بديرتنا العيب فينا و صدقوني القضاء عندنا عادل بس سلبيتنا باستخدام السلطة اهي اهم اسباب الفساد, و في مرة اسالوا احد الرؤساء قالوا له ديرتك كلها فساد اداري رد عليهم: في فساد بالقضاء ؟ قالوا لأ قال: خلاص دام في قضاء عادل ماكو فساد بس الحق ياخذ لا يمنح اللي عنده حق لازم يطالب و ماضاع حق وراه مطالب بس اذا كل واحد سكت وتصرف راح يخلي الفساد يتفشى و يطغى


و بالنهاية كاي كويتية اصلية ارجع اقول ما قاله غيري الحمدلله علي النعمة احنا احسن من غيرنا بوايد